Sony终于喺香港正式举行大型嘅A9发布会，虽然之前喺Showroom佢哋已经分别放咗两部机出嚟跳大家玩下，但当时两部机都唔可以插卡试相。终于记者会上Sony就準备咗可以插卡试相嘅A9畀一众记者试玩，效果係点？下面同大家讲讲。
睇试相前不如先再简单介绍一下呢部Sony嘅真旗舰A9有咩特点：
◆ Sony A9无论外形同大小都同之前嘅A7ii系列相若。
◆ 不过手感其实有少少唔同。
◆ 镜头接环亦有所加强。
◆ 今次用咗新设计嘅层叠式感光元件，提升20倍数据读取速度。
◆ 唔单只693个对焦区，对焦同追焦速度都大大提升。
◆ 优BIONZ X处理器运算力亦大大提升。
◆ 机身虽然似A7ii系列，但实际加入咗唔少设计提升操作嘅方便程度。由于将驱动模式同对焦模式转返成实体转盘畀用家选择，成部机大部份常用功能都可以直接调校。另外依家有埋Joy Stick再加Touch Screen畀你选择对焦区，又快又方便。如果要同A7ii系相比，虽然外形相似但实际操作性上有大大嘅提升。
另外，笔者亦有试过将专用直度把手装上去，一如Sony以往相机一样手握感同直接握住机身手柄拍摄可以话一模一样。可以留意今A9粒电比以往容量高一倍有多，用咗直度把手可以装两粒电池，就变咗相当于有以往4倍几电量，够一般专业用家影足全日相。
毕竟记者会上场地有所局限，笔者可以试相其实都有啲局限。不过大会就请嚟一位专影运动嘅职业摄影师Derek Lee同一众记者讲解佢连日嚟试用A9嘅感觉。而笔者之后亦有捉住Derek了解一下佢一啲使用上嘅细节。Derek表示喺追焦能力方面，由于A9拥有接近分布全画面嘅对焦区，所以相比其他单反系统喺追焦时明显冇咁易出现甩焦嘅情况。另外Derek喺台上亦有表示过佢几满意A9喺高ISO时嘅影像质素。
◆ Derek指由于冇黑屏问题，要影呢类球拍啱啱好打中网球嘅相轻易得多
◆ Derek再指出即使用到ISO12800都可以有令人满意效果下面一张Model相係笔者喺现场用A9配SEL 24~70 f2.8 GM用现场光拍摄嘅一张Model相。笔者就觉得质素算不过不失，但毕竟现场环境唔太好，所以就试住咁多先，下次借到返嚟再同大家详细试用。
另外下面段短片係笔者以20fps配以AF-C追焦连拍嘅效果，笔者将啲相压成短片方便大家睇。
◆ 呢张係未处理过嘅原相，所以会打侧咗，大家可以揿入张相开大成原相睇下细节 除咗A9，有关方面亦放咗两支新公布嘅超广角变焦镜头喺度，分别係SEL 16~35mm f2.8 GM同埋SEL 12~24mm f4 G。两支镜头都比想像中细支，而支12~24mm更加可以话得上係几轻，不过就唔算太细支，但拎出街应该都好方便下。
最后Sony亦一次过公布大部份新产品喺香港嘅官方定价，但两支新超广角镜头就未有价，简单嚟讲就係迟多少少先会正式发售，大家有兴趣嘅就要再等下喇。
